ڕوسیا موشەکی ناوەکی بڵاودەکاتەوە

ئاژانسی هەواڵی “تاس”ی ڕوسی بڵاویکردەوە، کە ئەمڕۆ شەممە، بە وتەی دیمیتری ڕۆگۆزین، سەرۆکی ئاژانسی ئاسمانی ڕوسیا، ڕۆسکۆسمۆس، مۆسکۆ بەنیازە یەکەم یەکەی سەربازی خۆی بە موشەکی سارماتی بەتوانای ناوەکی بڵاو بکاتەوە.

تاس وتەکانی ڕۆگۆزینی لە چاوپێکەوتنێکدا لەگەڵ کەناڵی 24ی ڕوسیا بڵاوکردۆتەوە، باسی لەوە کردووە، کە یەکەکە لە ئوگوری هەرێمی کراسنۆیارسکی 3000 کیلۆمەتر لە ڕۆژهەڵاتی مۆسکۆیە جێگیر دەکرێت.

سارمات موشەکی بالستیکی قورسی کیشوەربڕ و بەهێزترین جۆری چەکی جیهانە و، هیچ وڵاتێکی دیکە لە جیهاندا نییەتی، تەنانەت ئەمەریکیەکانیش پێیان دەڵێن شەیتان 2، ئەم موشەکە هێزی باڵا و مەودای زۆر دوور دەبڕێت و، توانای هەڵگرتنی کڵاوە ئەتۆمیەکانی هەیە.

جێی باسە، وەزارەتی بەرگری ڕوسیا ڕایگەیاند، کە هێزەکانی فڕۆکەیەکی جەنگی سو-25ی ئۆکرانییان تەقاندووەتەوە و سێ هەلیکۆپتەری می-8یان لە فڕۆکەخانەیەکی بچووکی هەرێمی خارکێڤ تێکشکاندووە