حکوومەتی لیتوانیا رەخنەی توندی لە بێلاڕووسیا گرت بەوەی ئاسانکاری بۆ کۆچبەران کردووە بەمەبەستی ئەوەی پرسی کۆچبەران دژ بە ئەورووپا بەکاربهێنێت، داواشدەکات سزای زیاتر بەسەر بێلاوڕوسیادا بسەپێندرێت.
کابرێلیوس لانسبێرگیس وەزیری دەرەوەی لیتوانیا رایگەیاند: “لەکاتێکدا بێلاڕووسیا پرسی کۆچبەران وەک چەکێکی سیاسی بەکاردەهێنێت، داوا لە ئەندامانی یەکێتی ئەوروپا دەکەم کە ستراتیجی و هەڵوێستی هاوبەشیان دژ بەو وڵاتە هەبێت”.
وەزیری دەرەوەی لیتوانیا باسی لەوەکرد، بێلاڕووسیا بە نایاسایی کۆچبەران لە دەرەوە هاوردەی وڵاتەکەی دەکات و هەر بە شێوەیەکی نایاسایی رەوانەی ئەوروپایان دەکات.
ئەمە لەکاتێکدایە کۆچبەران لە سنوورەکانی بێلاڕووسیاوە خۆیان دەگەیەننە لیتوانیا و تا ئێستا سەدان کۆچبەر کە زۆرینەیان عێراقین بەو شێوەیە خۆیان گەیاندووەتە لیتوانیا، هەر بەو هۆیەشەوە هەینی رابردوو لیتوانیا پەرژینێکی سنووری لە نێوان هەردوو وڵاتەکە درووستکرد.