ڕۆژی هەینی ٨ی ٥ی ٢٠٢٦ کرستینا هێربست سەرۆکی پەرلەمانی هەرێمی شلیسڤیگ هۆلشتاینی ئەلمانی لە تەلاری پەرلەمان پێشوازی کرد لە بەڕێز شفا بارزانی سەرپەرشتیاری گشتی رەوەندی کوردستانی.
لە دیدارەکەدا کە سەیران پەپۆ، ئەندامی پەرلەمانی هەرێمی شلیسڤیگ هۆلشتاینی ئەلمانی لەسەر لیستی پارتی سۆسیال دیموکرات ئامادەی بوو، باس لە بارودۆخی کوردستانیانی دانیشتووی هەرێمی شلیسڤیگ هۆلشتاین و ئەلمانییا بە گشتی کرا.
سەرۆکی پەرلەمانی هەرێمی شلیسڤیگ هۆلشتاین خۆشحالی خۆی بۆ سەرکەوتنی نەورۆزی مەزنی بۆن و نەورۆزی نێو بالەخانەی پەرلەمانی هەرێمەکەی دەربڕی، و پشتگیری خۆی بۆ دانیشتوانی کوردستانی ئەلمانییا دەربڕی، و هیوای سەرکەوتنی بۆ کارەکانی دیاسپۆرای کوردستانی لەسەر بنەمای دیموکراسی و مرۆڤ دۆستانە خواست.
شفا بارزانی سوپاسی حکومەت و گەلی ئەلمانییای دۆستی کرد، و پابەندی خۆی و کۆنفیدراسیۆنی ڕەوەندی کوردستانی بە بنەما دیموکراسی و مرۆڤ دۆستانەکان ڕاگەیاند و هیوای بەردەوامی پشتگیری و دۆستایەتی ئەلمانیا خواست.