بایدن: به‌رپرسانی ته‌قینه‌وه‌کەی کابووڵ بە سزای خۆیان دەگەن
جۆ بایدن سه‌رۆكی ئه‌مه‌ریكا دەڵێ، پێشبینییه‌كانی هه‌واڵگری وڵاتەکەی راست ده‌رچوون، كه هێرشێكی تیرۆریستی له لایه‌ن داعشه‌وه ده‌كرێته سه‌ر فڕۆكه‌خانه‌ی كابووڵ، جه‌ختیشیی كرده‌وه، به‌رپرسانی ئه‌و ته‌قینه‌وه‌یه سزا ده‌درێن.
جۆ بایدن سه‌رۆكی ئه‌مه‌ریكا رایگه‌یاند، رێنمایی پێویست دراوه‌ته پنتاگۆن، بۆ دانانی پلانێكی گونجاو بۆ هێرشكردنه سه‌ر سه‌ركرده‌كانی داعش و، ئه‌وانه‌ی كه به‌رپرسن له ته‌قینه‌وه‌كه‌ی فڕۆكه‌خانه‌ی كابووڵ و، به‌هێزه‌وه، له كات و شوێنی دیاریكراو و گونجاودا، وه‌ڵامێكی تووندیان ده‌ده‌نه‌وه.
بایدن ئاماژه‌ی بەوەشكرد، ویلایه‌تی خراسانی داعش، پیلانداڕێژه‌ری ته‌قینه‌وه‌كه‌ی فڕۆكه‌خانه‌ی كابووڵ بوو، بۆیه بڕیاری سه‌ربازی تووند ده‌رده‌كا بۆ ئه‌وه‌ی سوپای ئه‌مه‌ریكا به كاری خۆیان هه‌ڵسن.
روونیشی کردەوە، کە هیچ به‌ڵگه‌یه‌كیان له‌به‌رده‌ست نییه، كه هه‌ماهه‌نگی له نێوان تاڵیبان و داعش له ویلایه‌تی خراسان، هه‌بووبێت.