بەرنامەکانی حکوومەتی ئێران بۆ بووژانەوەی گۆلی ورمێی رۆژهەڵاتی کوردستان، هیچ دەرئەنجامێکی نەبووە و قەبارە و ئاستی ئاوەکەش، بە بەراورد لەگەڵ ساڵی رابردوو رێژەیەکی زۆر دابەزیوە.
بەرپرسی ناوەندی نەتەوەیی وشکەساڵی ئێران، رایگەیاندووە، بارودۆخی گۆلی ورمێ بە بەراورد لەگەڵ رابردوودا خراپتر بووە و، گەڕاوەتەوە پێش ئاستی گەڵاڵەی بووژانەوەی دەوڵەتی حەسەن ڕووحانی.
هەواڵدەریی ئیسنای ئێرانیش، لەسەر زاری سەرۆکی ئیدارەی ئاوی پارێزگای ورمێ، رایگەیاندووە، کە ئاستی ئاوی گۆلی ورمێ، بە بەراورد لەگەڵ ساڵی رابردوو 63 سانتی مەتر کەمی کردووە و، هەر ئەوە بووە بە هۆکاری کەمبوونەوەی قەبارەی گۆلی ورمێ، لە 3655 کیلۆمەترەوە بۆ 2194 کیلۆمەتری چوارگۆشە.
بەپێی ئەو ئامارە، فراوانی گۆلی ورمێ، ئەمساڵ بە بەراورد لەگەڵ ساڵی رابردوو، تا ئێستا نزیک بە 1461 کیلۆمەتری دیکە کەمی کردووە، کە بە گشتی دەکاتە یەک لەسەر چواری قەبارەی ئەو گۆلە