هەریەکە لە پاسپۆرتی یابان و سەنگافورە لە پلەی یەکەمدا دێن، کە دەتوانن بێ ڤیزا گەشت بۆ 192 وڵات بکەن، لە بەرانبەریشدا خراپترین پاسپۆرت وڵاتی ئەفغانستانە و هەریەکە لە ئێراق و سوریاش لە پێش کۆتایی خراپترین پاسپۆرتی وڵاتانن، کە تەنیا دەتوانن گەشتی 26 وڵات بە بێ ڤیزا بکەن.
یابان و سەنگافورە پێکەوە پلەی یەکەمیان وەرگرتووە، کە هەڵگری ئەو پاسپۆرتانە، دەتوانن بێ ڤیزا گەشتی 192 وڵات بکەن، یا لە کاتی گەیشتنیان ڤیزا وەربگرن.
هەروەها کۆریای باشوور و ئەڵمانیا لە پلەی دووەمدان، کە دەتوانن بێ ڤیزا گەشتی 190 وڵات بکەن و، فینلاند و ئیتالیا و لۆکسمبۆرگ و ئیسپانیا لە ئاستی سێیەمدان، کە دەتوانن گەشتی 189 وڵات بکەن، هاوکات نەمسا و دانمارک و فەرەنسا و هۆڵەندا و سوید، لە پلەی چوارەمدان، کە دەتوانن بێ ڤیزا گەشتی 188 وڵات بکەن.
ئێرلەندا و پورتوگال لە پلەی پێنجەم هاتوون، کە خاوەن پاسپۆرتەکانیان ڕێگەیان پێدراوە بێ ڤیزا بچنە 187 وڵات.
شانشینی یەکگرتوو و ئەمەریکا لە ڕیزبەندی پێشووەوە بە یەک شوێن سەرکەوتون و ئێستا لەگەڵ سویسرا و نەرویج و بەلجیکا و نیوزلەندا، لە پلەی شەشەمدان.
لە لایەکی دیکەوە، ئەفغانستان لە پلەی کۆتاییدایە و تەنیا دەتوانن گەشتی 26 وڵات بێ ڤیزا بکەن، لە کاتێکدا ئێراق و سوریا لە پێش ئەفغانستانەوەن.
کریستیان کالین، سەرۆکی هێنلی و هاوبەشەکان و درووستکەری چەمکی پێرستی پاسپۆرت، لە نوێترین ڕاپۆرتیدا رایگەیان، پاسپۆرت و ڤیزا یەکێکە لە گرینگترین ئامرازەکانی کاریگەری لەسەر نا یەکسانی کۆمەڵایەتی لە جیهاندا، چونکە هەلی جووڵەی جیهانی دەناسێنن.