لیبراڵەکان پێشنیاریان کردووە ئەو منداڵانەی پەنابەرن و مەترسییان لەسەرە، مافی ئەوەیان پێ بدرێت، کە خۆیان داوای قەدەغەکردنی گەشت بکەن بۆ وڵاتەکانیان.
وەزیری یەکسانی پارێزگاران نینا لارشۆن وتی: یاسای قەدەغەکردنی گەشت تەنیا بۆ خزمەتگوزارییە کۆمەڵایەتییەکانی شارەوانیی جێبەجێ ناکرێت، بەڵکوو دەبێت منداڵانی پەنابەرانیش بگرێتەوە.
ئەو بە ڕۆژنامەی Aftonbladet ی وت: سەدان منداڵ و گەنج لە ماوەی ساڵی خوێندندا بە پێچەوانەی خواستی خۆیان لە سویدەوە بۆ مەبەستی وەک هاوسەرگیری بەزۆر یان خەتەنەکردنی مێینە دەبرێنەوە وڵاتانی خۆیان.
وەزیر پێشنیاری کرد، کە لێکۆڵینەوە بۆ دیاریکردنی تەمەنی گونجاو بۆ داواکردنی قەدەغەکردنی گەشت و هەروەها بڕیاردان لەسەر ئەوەی کێ دەبێت داواکاریی پێشکەش بکات.
قەدەغەکردنی گەشت بۆ منداڵان و گەنجانی پەنابەران لەنێوان ساڵانی 2024 و 2025، پێنج ئەوەندە زیادی کردووە، ئەوەش دوای ئەوەی یاسایەکی نوێی قەدەغەی گەشتی منداڵانی لەو وڵاتە فراوان کرد.