کۆنفیدراسیۆنی ڕەوەندی کوردستانی بە نیگەرانییەکی قووڵەوە دەڕوانێتە ئەو گرژی و نەتەباییەی کە لەنێوان گرووپێک لە کوردستانیانی دیاسپۆرا و بەتایبەتی لە وڵاتی هۆڵەندا هاتووەتە ئاراوە، جێگەی داخێکی زۆرە کە لەکاتی بەڕێوەچوونی ئاهەنگی نەتەوەیی جەژنی نەورۆزی ساڵی 2026 لەو وڵاتە، کۆمەڵێک گەنجی کورد پەنایان بردووەتە بەر توندوتیژی و هێرشیان کردووەتە سەر گرووپێکی هونەریی سەر بە فیدراسیۆنی ڕەوەندی کوردستانی لە هۆڵەندا.
ئەم ڕووداوە نەخوازراوە ئەوەی دەرخست کە گرووپێک لە کوردستانیانی تاراوگە ناتوانن یەکڕیزی و گیانی لێبوردەیی لەنێوان خۆیاندا بپارێزن، ئەم جۆرە ڕەفتارانە بە هیچ شێوەیەک خزمەت بە دۆزی ڕەوای گەلەکەمان ناکەن و تەنها زیان بە وێنە و پێگەی کوردستانیان لە کۆمەڵگەی نێودەوڵەتیدا دەگەیەنن.
ئێمە لە کۆنفیدراسیۆنی ڕەوەندی کوردستانی، وێڕای دەربڕینی نیگەرانیی توندی خۆمان بەرامبەر بەم جۆرە کردەوانە، جارێکی دیکە بەوپەڕی باوەڕەوە پێداگری دەکەین لەسەر گرنگیی پاراستنی یەکڕیزی و تەبایی نێوان سەرجەم ڕۆڵەکانی گەلی کوردستان، داواکارین لە هەموو لایەک بەرژەوەندیی باڵای نەتەوەیی بخەنە سەرووی هەموو جیاوازییەکانەوە و بە ڕۆحێکی ئاشتییانە و شارستانییانە نوێنەرایەتیی کلتوور و نەتەوەکەمان بکەن لە سەرتاسەری جیهاندا.
کۆنفیدراسیۆنی ڕەوەندی کوردستانی
24ـی ئاداری 2026