بەهۆی بەشداریکردنی لە ڕێورەسمی نەورۆز هەفتەیەکە ژنێک کورد دەستگیرکراوە

دوای هەفتەیەک لە دەستبەسەرکرانی بەربڵاوی هاووڵاتییانی کورد بەهۆی بەڕێوەچوونی ڕێوڕەسمی نەورۆز، ناسنامەی یەکێکی دیکە لە دەستبەسەرکراوان ئاشکرا بوو.

بە گوێرەی هەواڵی ڕێکخراوی مافی مرۆڤی هەنگاو، یەکێ لەو ژنانەی لە نەورۆزی سنە دەستبەسەر کراوە، ناوی مەستوورە مستەفا موبارەکی تەمەن 45 ساڵە، کە دوای 6 ڕۆژ لە دەستگیرکردنی گوازراوەتەوە بۆ ناوەندی چاکسازی و پەروەردەی ئەو شارە.

مەستوورە مستەفا موبارەک، ڕۆژی دووشەممە 21ی مانگ، دوای کۆتایی هاتنی ڕێوڕەسمی نەورۆز لە پارکی منداڵانی شاری سنە، دەستگیرکراوە، بە گوتەی سەرچاوەیەکی ئاگادار، ئەو هاووڵاتییە، دوای ئەوەی سواری ئوتۆمبێلێکی ئاسایی بووە، لەلایەن شۆفێرەکەوە ڕادەستی هێزە ئەمنییەکان کراوە.

جێی باسە، دوای تەواوبوونی ڕێوڕەسمی نەورۆز لە پارکی منداڵانی شاری سنە، هێزە ئەمنییەکان بە جلی کوردییەوە و بە ئوتۆمبێلی ئاسایی، داوایان لە خەڵکەکە کردووە کە بیانگەیەننەوە و، ئەوانەی کە سواربوون، ڕاستەوخۆ براونەتە ئیدارەی ئیتڵاعاتی سنە