لە گۆڕانکارییەکی مێژوویی و بێپێشینەدا، پارتی ریفۆرمی راستڕۆی پۆپۆلیست سەرکەوتنێکی گەورەی لە هەڵبژاردنە هەرێمی و خۆجێییەکانی بەریتانیا تۆمار کرد و توانی لە هێزێکی ئۆپۆزیسیۆنی بچووکەوە ببێتە یەکێک لە گەورەترین جەمسەرە سیاسییەکانی وڵاتەکە.
پارتەکە بە سەرۆکایەتیی نایجل فەراج، توانی زیاتر لە 1400 کورسی لە ئینگلتەرا، 34 کورسی لە وێڵز و 17 کورسی لە سکۆتلاند بەدەستبهێنێت، بەمەش کۆنترۆڵی چەندین شارەوانی ستراتیژیی، لەوانەش لە ناوەڕاستی لەندەن، لە دەستی پارتەکانی کار و پارێزگاران دەرهێنا کە دەیان ساڵ بوو قۆرخیان کردبوو.
پارتەکە کە لە ساڵی 2018 بۆ پرسی برێکزیت دامەزرا و دواتر ستراتیژییەکەی گۆڕی، ئێستا کار بۆ کەمکردنەوەی باج، بچووککردنەوەی خەرجییەکانی حکومەت و هەڵوەشاندنەوەی یاساکانی وزەی سەوز دەکات، خاڵی هەرە بەهێزی بەرنامەکەی رووبەڕووبوونەوەی لێشاوی کۆچبەرانە، کە دەیەوێت لەرێگەی دروستکردنی فەرماندەییەکی تایبەتی هاوشێوەی ئەمریکا و کشانەوە لە پەیماننامەکانی مافی مرۆڤەوە، سەدان هەزار کۆچبەری نایاسایی بەپەلە دیپۆرت بکاتەوە، هاوکات بە تووندی دژی ئیسلامی سیاسییە و دەیەوێت رێکخراوی ئیخوان موسلیمین قەدەخە بکات و فەرهەنگی بەریتانی بپارێزێت.
لەسەر ئاستی سیاسەتی دەرەوە، پارتی ریفۆرم ئاراستەیەکی ڕوونی هەیە کە خۆی لە پشتیوانییەکی بێسنوور بۆ ئیسرائیل و پەیوەندییەکی ستراتیژیی تووندوتۆڵ لەگەڵ ئەمریکادا دەبینێتەوە، پارتەکە پشتگیری لە بەردەوامیی فرۆشتنی چەک بە تەلئەڤیڤ دەکات و هەموو تۆمەتەکانی کۆمەڵکوژی رەتدەکاتەوە، لە هەمان کاتیشدا دیدگایەکی زۆر ئەرێنی بەرامبەر بە دۆناڵد ترەمپ هەیە و دەیەوێت سیاسەتی دەرەوەی بەریتانیا بە تەواوی لەگەڵ رێکارە تووندەکانی ئیدارەی ئەمریکادا یەکبخات.
کارزان حەیدەر