بەڕێز-ئاکۆ محەممەد، بەڕێوەبەری گشتی تۆڕی میدیایی رووداو
تەواوی کارمەندان و میدیاکارانی تۆڕی میدیایی رووداو
بەداخ و پەژارەیەکی زۆرەوە، هەواڵی کۆچی دوایی رۆژنامەنووسی دیار و بەرپرسی نووسینگەی بەغدای تۆڕی میدیایی رووداو، کاک (هەڵکەوت عەزیز)مان پێگەیشت، کە لە کاتی جێبەجێکردنی ئەرکی پیشەیی و رۆژنامەوانی و لە رووداوێکی دڵتەزێنی هاتوچۆدا لەسەر رێگەی چوون لە بەغداوە بۆ بەسرا گیانی سپارد.
لەم بۆنە خەمناکەدا، کۆنفیدراسیۆنی رەوەندی کوردستانی پرسە و هاوخەمیی قووڵی خۆی ئاراستەی خانەوادە و کەسوکاری بەڕێزیان و تەواوی بەڕێوەبەرایەتی و ستافی تۆڕی میدیایی رووداو دەکات.
کۆچکردوو هەڵکەوت عەزیز، پەیامنێر و رۆژنامەنووسێکی زۆر چالاک، دڵسۆز، پیشەگەر و پڕۆفیشناڵ بوو، کە بەوپەڕی لێوەشاوەیی و بوێرییەوە ببووە دەنگی رەسەن و راستییەکانی خەڵکی کوردستان لە بەغدا، لەدەستدانی ئەم رۆژنامەنووسە ماندوونەناسە، زیانێکە بەر کاروانی راگەیاندنی پیشەیی لە کوردستان کەوت.
لە یەزدانی مەزن داواکارین گیانی کۆچکردوو بە بەهەشتی بەرین شاد بکات و دڵنەوایی، سەبووری و ئارامی بە خانەوادە، ئازیزان و سەرجەم هاوپیشەکانی ببەخشێت.
انا للە وانا الیە راجعون
کۆنفیدراسیۆنی رەوەندی کوردستانی
8ی حوزەیرانی 2026