لە هەنگاوێکی مێژوویی و بێپێشینەدا بۆ رەوەندی کوردستانی، شاری دۆسڵدۆرفی ئەڵمانیا میوانداریی یەکەم کۆنگرەی فیدراسیۆنی نێودەوڵەتیی زمانی کوردی کرد، لەم رووداوە گرنگەدا کە بە بەشداریی نوێنەرانی حکومەتی هەرێمی کوردستان، دەوڵەتی ئەڵمانیا و لایەنە سیاسییەکان بەڕێوەچوو، جەخت لە کۆتاییهێنان بە پەرتەوازەیی هەوڵەکان و دروستکردنی چەترێکی یەکگرتووی نەتەوەیی بۆ پاراستنی زمانی دایک لە تاراوگە کرایەوە.
شفا بارزانی، سەرپەرشتیاری گشتیی رەوەندی کوردستانی، لە میانی پێشکەشکردنی گوتارێکی ستراتیژیدا لە کۆنگرەکەدا کە ئەمڕۆ شەممە 27ی حوزەیرانی 2026 بەڕێوەچوو، سڵاو و هیوای سەرکەوتنی سەرۆک مەسعود بارزانی بە بەشداربووان گەیاند بۆیە وێڕای بەخێرهێنانی میوانان و دیپلۆماتکاران، راگەیاندنی ئەم فیدراسیۆنەی بە وەرچەرخانێکی مێژوویی لە ژیانی دیاسپۆرادا وەسف کرد کە تێیدا بۆ یەکەمجار، چەترێکی نەتەوەیی بۆ سەرجەم ناوەندە ئەکادیمی و خوێندنگە کوردییەکان دروست دەکرێت، تاوەکو ببێتە ماڵێکی گشتگیر بۆ گەیاندنی زمانی کوردی بە تەواوی خێزانەکانی تاراوگە بێ هیچ جیاوازییەک.
سەرپەرشتیاری گشتیی رەوەندی کوردستانی تیشکی خستە سەر ئەوەی کە گەرچی لە رابردوودا هەوڵی تاکەکەسی و دامەزراوەیی جیاواز بۆ خزمەتی زمان دراون، بەڵام کاریگەرییەکانیان سنووردار بوون، بۆیە ئەم فیدراسیۆنە دەبێتە مینبەرێک بۆ کۆکردنەوەی هەموو ئەو هەوڵانە، هەروەها بە راشکاوی ئاماژەی بەوە کرد کە ئەم یەکڕیزییە رەنگە بە دڵی هەندێک هێزی سیاسی و وڵاتانی داگیرکەر نەبێت کە بەردەوام هەوڵی درزخستنە نێوان کوردان دەدەن، بەڵام یەکگرتنی 35 قوتابخانەی کوردی لە جیهاندا و پشتیوانیی پسپۆڕان و حکومەتی هەرێمی کوردستان، ئەو راستییە دەسەلمێنن کە هیچ ئەجێندایەکی دەرەکییان بەسەردا ناسەپێندرێت و کوردستانییان خۆیان بە برایەتی بڕیار لە چارەنووس و ئایندەی نەتەوەکەیان دەدەن.
لە بەشێکی دیکەی گوتەکانیدا، شفا بارزانی جەختی لە فەلسەفەی مانەوەی نەتەوە کردەوە و روونی کردەوە کە ونکردنی زمان بە واتای ونکردنی مێژوو دێت، بەتایبەتی بۆ نەتەوەی کورد کە هێشتا خاوەنی دەوڵەتی سەربەخۆ نییە، بۆیە زمان تاکە زامنی مانەوە و هێشتنەوەی خەونی دروستکردنی کوردستانێکی سەربەخۆیە، لەسەر راسپاردەی سەرۆک بارزانیش، بەڵێنی پاڵپشتیی و هاوکاریی تەواوی بۆ فیدراسیۆنەکە دا لە پێناو کردنەوەی قوتابخانەی زیاتر و پاراستنی زمانەکە.
شفا بارزانی داوایەکی رژدی ئاراستەی دایکان و باوکان لە تاراوگە کرد کە ببنە پشتیوانی فیدراسیۆنەکە، هانی منداڵەکانیان بدەن و لە ماڵەوە تەنیا بە زمانی کوردی قسە بکەن، بۆ ئەوەی ئەو میراتەی باوپاپیران لە فەوتان رزگار بکەن، چونکە هیچ کەسێکی دیکە زمانەکەیان بۆ ناپارێزێت، لەگەڵ ئەوەشدا پێشنیازی داڕشتنی ستانداردێکی یەکگرتووی بۆ زمانی کوردی لە دیاسپۆرا کرد و دەستخۆشی لە دەستەی دامەزرێنەران کرد کە بە سەرکەوتوویی ناوەندەکانیان لەژێر ئەم چەترەدا کۆکردووەتەوە.
سەدان هەزار خێزانی کورد لە وڵاتانی ئەورووپا و جیهان دەژین کە بەهۆی نەبوونی سیستەمێکی پەروەردەیی یەکگرتووی کوردییەوە، نەوەکانیان رووبەڕووی مەترسیی دوورکەوتنەوە لە زمانی دایک و تواندنەوە لەناو کلتووری وڵاتانی خانەخوێدا بوونەتەوە، دروستکردنی فیدراسیۆنی نێودەوڵەتیی زمانی کوردی، هەوڵێکی ستراتیژییە بۆ رێکخستنەوەی توانا پەرشوبڵاوەکانی تاراوگە و بەدامەزراوەییکردنی پرۆسەی فێرکردنی زمانی کوردی، تاوەکو نەوەی نوێی رەوەندی کوردستانی بە ناسنامە و رەسەنایەتیی نەتەوەیی خۆیانەوە گرێ بدرێنەوە و ببنە پردێکی بەهێز لە نێوان نیشتمان و جیهانی دەرەوەدا.
کارزان حەیدەر
https://www.facebook.com/karzan.haedar.7
009647504475408
