وەزارەتی دەرەوەی عێراق، ئەمڕۆ یەكشەممە، رایگەیاند، فواد حسێن، وەزیری دەرەوەی عێراق تووشی كۆرۆنا بووە، بەڵام تەندروستی باشە و بەرەو چاكبونەوە دەڕوات.
د. ئەحمەد سەحاف، گوتەبێژی وەزارەتەكە، كەمێك لەمەوبەر لە بەیاننامەیەكدا ئاشكرایكرد، هەندێك لە ئاژانسەكانی هەواڵ بڵاویانكردووەتەوە، كە فواد حسێن وەزیری دەرەوەی عێراق، بەهۆی تووشبوونی بە ڤایرۆسی كۆرۆنا، بەشدار نابێت لە كۆبونەوەی راوێژكاریی وەزیرانی دەرەوەی دەوڵەتانی ئەندام لە كۆمكاری عەرەبی.
گوتەبێژی وەزارەتی دەرەوەی عێراق، پشتڕاستی كردووەتەوە كە فواد حسێن تووشی كۆرۆنا بووە، بەڵام لە ئێستادا دۆخی تەندروستی باشە و بەرەو چاكبوونەوە دەڕوات و، لە داهاتوویەكی نزیكیشدا دەگەڕێتەوە سەر كارەكەی