بۆ بەهێزکردنی پەیوەندییە کۆمەڵایەتییەکان و شادکردنەوەی خێزانەکان، فیدراسیۆنی کوردستانی لە هۆڵەندا سەیرانێکی گەورەی بەهارە و هاوینە بۆ ساڵی 2026 ڕێکدەخات، چالاکییەکە چەندین بڕگەی هەمەجۆر و سەرنجڕاکێش بۆ گەورە و بچووک لەخۆدەگرێت و دەبێتە وێستگەیەک بۆ کۆبوونەوەی ڕەوەندی کوردی لە کەشێکی پڕ لە خۆشی و ئومێددا.
ئەم هەنگاوە دڵخۆشکەرە دوای ئەو سەرکەوتنە گەورەیە دێت کە کۆبوونەوە و چالاکییەکانی پێشووی فیدراسیۆنەکە بەدەستیان هێنابوو، ئامانجی سەرەکی لەم جۆرە چالاکییانە، دروستکردنی پردێکی پەیوەندیی پتەوە لە نێوان تاکەکانی کۆمەڵگەی کوردیدا، ئەمساڵیش بە پەرۆشێکی زۆرەوە ئامادەکاری کراوە بۆ سەرلەنوێ کۆکردنەوەی خێزانەکان، گەنجان و دۆستانی گەلی کورد، تاوەکو لە ڕۆژێکی تایبەتدا لە یەکتر نزیک ببنەوە و کەلتوور و نەریتی پێکەوەبوون زیندوو ڕابگرن.
ئەم سەیرانە تەنیا کۆبوونەوەیەکی ئاسایی نابێت، بەڵکو بەرنامەیەکی دەوڵەمەندی بۆ دانراوە کە گونجاوە بۆ هەموو تەمەنەکان، لەوان، مۆسیقا و کاتبەسەربردنی شاد، ڕەخساندنی کەشێکی مۆسیقیی تایبەت کە ڕۆحییەتی نەتەوەیی و کوردەواری دەبەخشێتە ئامادەبووان و کاتێکی پڕ لە ئارامییان پێشکەش دەکات، هەروەها یاری و کەیفخۆشیی منداڵان: دابینکردنی یاریی جۆراوجۆر، بەتایبەتی یاریی بازدانی منداڵان، بۆ ئەوەی منداڵانیش کاتێکی بێوێنە و پڕ لە قاقا بەسەر بەرن و یادگارییەکی جوان تۆمار بکەن.
لەگەڵ ئەوەشدا دیدار و دیالۆگ، ڕەخساندنی زەمینەیەکی گونجاو بۆ یەکترناسین، نوێکردنەوەی پەیوەندییەکان و ئاڵوگۆڕی بیروڕا لە نێوان ئامادەبوواندا.
بۆ ئەو کەسانەی ئارەزووی بەشداریکردنیان هەیە، زانیارییە تەواوەکانی کات و شوێنی چالاکییەکە بەم شێوەیەی خوارەوەن:
ڕۆژ و ڕێکەوت: یەکشەممە، 21ی حوزەیرانی 2026
کات: لە کاتژمێر 1ی دوانیوەڕۆ تاوەکو 7ی ئێوارە
شوێن: باخچەی ناوداری کرالینگسێ بۆس
ناونیشانی تەواو: Langepad 30, 3062 CJ Rotterdam