لە کێبڕکێیەکی ئاستبەرز و پڕ جۆش و خرۆشدا لە وڵاتی ئەڵمانیا، بۆکسێنەری بەتوانای کورد بادین حەسۆ، جارێکی دیکە سەلماندی کە لە گۆڕەپانی بۆکسێندا مەحاڵە بوەستێنرێت، ئەو توانی لە یارییەکی سەرنجڕاکێشدا ببێتە پاڵەوانی بۆکسێنی ئەڵمانیا و بە جلوبەرگێک کە نەخشێنراو بوو بە ڕەنگەکانی ئاڵای کوردستانەوە، جامی سەرکەوتن و پشتێنەی پاڵەوانێتییەکە بەرز بکاتەوە.
لەم ڕووبەڕووبوونەوەیەدا کە بۆ بەدەستهێنانی ناسناوی پاڵەوانێتییەکە بوو، بادین حەسۆ بەرانبەر بۆکسێنەرێکی ئەڵمانی بە ناوی دەیڤد چووە ناو ڕینگەوە، یارییەکە زۆری نەخایاند و هێزی مستەکانی پاڵەوانە کوردەکە دەرفەتی بە ڕکابەرەکەی نەدا، چونکە هەر لە خولی دوو دا، بادین بە لێدانێکی کوشندە و بە شێوازی نۆک ئاوت کۆتایی بە یارییەکە هێنا و بەرانبەرەکەی خستە سەر زەوی. ئەم سەرکەوتنە خێرایە بووە هۆی دروستبوونی خۆشییەکی زۆر لەنێو ئامادەبووان و تیمی ڕاهێنەرانیدا.
دوای بەدەستهێنانی ناسناوەکە، بادین هەستی خۆشحاڵی خۆی دەربڕی کە یارییەکەی بەو شێوە ئاسانە و بێ ماندووبوونێکی زۆر بردووەتەوە، ئەو وەک وەفایەک بۆ نەتەوەکەی، ئەم سەرکەوتنە گەورەیەی پێشکەش بە تەواوی گەلی کورد لە هەر چوار پارچەی کوردستان و ئەو پێشمەرگانە کرد کە لەپێناو نیشتمان قوربانییان داوە، هاوکات ئامادەبووان و هاوڕێکانی کە زۆربەیان کورد بوون، شانازییەکی گەورەیان بە بینین و شەکاندنەوەی ئاڵای کوردستانەوە دەکرد لەسەر ئەو شانۆ جیهانییە.
ئەوەی جێگەی سەرنجە و مێژوویەکی زێڕینە بۆ بادین حەسۆ، تۆمارە بێوێنە و پاکەکەیەتی لە جیهانی بۆکسێندا، تا ئێستا ئەم یاریزانە کوردە 24 یاریی پیشەگەرانەی ئەنجامداوە و لە سەرجەمیاندا براوە بووە، بەبێ ئەوەی تام و تاڵی هیچ شکستێک بچێژێت. لەو ژمارە گەورەیەش، توانیویەتی 13 یارییان بە لێدانی کوشندە و نۆک ئاوت بباتەوە، کە ئەمەش ئاماژەیەکی ڕوونە بۆ هێزی جەستەیی و لێهاتووییە تەکنیکییەکەی.
ڕاهێنەرەکانی بادین کە پێکهاتوون لە یوسف ڕەمەزان کە ماوەی 16 ساڵە سەرپەرشتی دەکات، شانبەشانی ئەحمەد، باوەڕێکی زۆر و پتەویان بە تواناکانی هەیە، ئەوان دووپاتیان کردەوە کە بادین هەمیشە لە ڕووی هزری و جەستەییەوە لەوپەڕی ئامادەییدایە و خاوەنی تەکنیکێکی هێندە بەرزە کە پێویستی بە فێربوونی شتی نوێی زۆر نییە.
بۆ داهاتووش، تیمی ئەم پاڵەوانە کوردە ئامانجێکی گەورەتریان هەیە و مژدەی ئەوەیان داوە کە ئەگەر هەموو هەنگاوەکان بەپێی پلانەکان بڕوات، یاری داهاتووی بادین حەسۆ کێبڕکێکردن دەبێت لەسەر بەدەستهێنانی ناسناوی پاڵەوانێتیی زیوی جیهانی، کە هەنگاوێکی زۆر گەورەتر دەبێت لە کاروانی وەرزشیی ئەم یاریزانەدا.
کارزان حەیدەر
https://www.facebook.com/karzan.haedar.7
