دادگای عێراق دەستگیرکردنی گرووپێکی راگەیاند، کە ئامادەکارییان بۆ ئەنجامدانی ساختەکاری لە هەڵبژاردنە پێشوەختەکەی وڵاتدا کردووە.
ئەمڕۆ ئاژانسی هەواڵی عێراق، راگەیەندراوێکی دادگای بڵاوکردەوە، کە گرووپێک دەستگیرکراوون لە خۆئامادەکردندا بوون بۆ ئەنجامدانی ساختەکاری و گۆڕینی ئەنجامەکانی هەڵبژاردنە پێشوەختەکەی عێراق.
لە راگەیاندراوەکەدا، ئەوەش هاتووە، کە گرووپەکە ویستوویانە بەو کارانەیان پشێوی سیاسیی لە وڵات درووست بکەن، هەروەها مەبەستیشیان بووە، کە سووکایەتی بە کەسایەتییە سیاسیی و کۆمەڵایەتییە دیارەکانی عێراقیش بکەن.
باسیش لەوە کراوە، کە یەکێ لە سیاسەتمەدارەکان لەگەڵ گرووپەکە کۆبووەتەوە و، پێشنیازی بۆیان کردووە لە ئەنجامدانی کارەکانیان چەند پەیج و ئەکاونتێکی ساختە درووست بکەن، بێ ئەوەی لە راگەیاندراوەکەدا ناوی سیاسەتمەدارەکە هێندرابێت.