پارکی جانسۆن فارمز بە ناوی «پارکی دۆستایەتی» کرایەوە؛ هەنگاوێک بۆ بەهێزکردنی پەیوەندییەکانی زاخۆ و مۆرهێد

پارکی جانسۆن فارمز لە شاری مۆرهێد، لە ڕێوڕەسمێکدا بۆ ڕێزگرتن لە دۆستایەتی نێوان زاخۆ و مۆرهێد، بە ناوی نوێی «پارکی دۆستایەتی زاخۆ-مورهێد» کرایەوە. ئەم ڕێوڕەسمە بە ئامادەبوونی بەرپرسانی شار، سەرکردایەتی زانکۆ و نوێنەرانی رەوەندی کوردستانی بەڕێوەچوو و هەنگاوێکی دیکە بوو بۆ جێبەجێکردنی پەیماننامەی دۆستایەتی نێوان هەردوو شار و فراوانکردنی پەیوەندییە کولتووری، زانستی و کۆمەڵایەتییەکانیان.

شێلی کارلسۆن، شارەوانی مۆرهێد، پێشوازی لەم هەنگاوە کرد و ناونانی پارکەکە بە ناوی دۆستایەتی بەرز نرخاند. کارلسۆن هەروەها لە پلانی خۆی بۆ سەردانکردنی کوردستان دوا و جەختی لە ئارەزووی خۆی بۆ بەهێزکردنی پەیوەندییەکانی نێوان هەردوو شار کردەوە.

دکتۆر تیم داونز، سەرۆکی زانکۆی دەوڵەتی مینیسۆتا لە مۆرهێد، باسی دەستکەوتەکانی پەیماننامەی دۆستایەتی کرد و هاوکاریی زانستی و زانکۆیی بە یەکێک لە ئەنجامە بەهادارەکانی دانا. داونز ئاماژەی بەوە کرد کە تاکو ئێستا دوو خوێندکار لە زاخۆ بۆ خوێندن هاتوونەتە مۆرهێد و ئەم ئاڵوگۆڕەی بە هەنگاوێکی گرنگ بۆ دروستکردنی پەیوەندیی زانستیی بەردەوام وەسف کرد. هەروەها باسی هەوڵە بەردەوامەکان بۆ فراوانکردنی ئەم هاوکارییە کرد.

شان برادێنبەرگ، بەڕێوەبەری پارکەکانی مۆرهێد، پێشوازی لەم دەستپێشخەرییە کرد و گۆڕینی ناوی پارکەکەی بە هەنگاوێکی ئەرێنی بۆ نزیککردنەوەی خەڵکی هەردوو شار زانی. وتاربێژانی دیکەش پشتگیریی خۆیان بۆ پڕۆژەکە و ڕۆڵی لە بەهێزکردنی دۆستایەتی و هاوکاری دەربڕی.

سکۆت هۆڵدمەن، ڕاوێژکاری کاروباری خێرخوازی، باسی ئەزموونی سەردانەکەی بۆ کوردستان لە مانگی نۆڤەمبەری ساڵی ڕابردوو کرد؛ سەردانێک کە لەگەڵ شاندێک و لە چوارچێوەی بەرنامەکانی کۆنفیدراسیۆنی رەوەندی کوردستانی ئەنجامی دابوو. هۆڵدمەن ئەو سەردانەی بە ئەزموونێکی پڕبەها و دەوڵەمەند وەسف کرد کە ناسینی ئەوی بۆ کوردستان و خەڵکەکەی قووڵتر کردووەتەوە.

ئەم پڕۆژەیە بە هەماهەنگی و بەدواداچوونی بەردەوامی جیهان بریفکی، ڕاوێژکاری نووسینگەی پەیوەندییە نێودەوڵەتییەکانی کۆنفیدراسیۆنی رەوەندی کوردستانی بەرەوپێش چوو؛ کە ڕۆڵی لە سەرکەوتنی جێبەجێکردنی ئەم دەستپێشخەرییەدا هەبوو.

لە درێژەی ڕێوڕەسمەکەدا، پەیامی گەهدار شێخۆ، سەرۆکی ئیدارەی سەربەخۆی زاخۆ، لەلایەن شان برادێنبەرگەوە خوێندرایەوە. شێخۆ لە پەیامەکەیدا داخ و پەژارەی خۆی دەربڕی کە نەیتوانیوە ئامادەی ڕێوڕەسمەکە بێت و ڕایگەیاند کە نیازی هەیە لە داهاتوودا بەشداریی بەرنامەیەک بکات. هەروەها بە فەرمی ڕایگەیاند کە لە هەنگاوێکی بەرامبەردا، پارکێک لە زاخۆ بە ناوی «پارکی دۆستایەتی مۆرهێد–زاخۆ» ناودەنرێت.

ڕەحیم ڕەشیدی، بەرپرسی نووسینگەی پەیوەندیی نێودەوڵەتیی کۆنفیدراسیۆنی رەوەندی کوردستانی، لە ڕێوڕەسمەکەدا ئامادە بوو. مستەر كورد لە پەراوێزی بەرنامەکەدا لەگەڵ بەرپرسانی مۆرهێد، سەرکردایەتی زانکۆ و نوێنەرانی کۆمەڵگەی ناوخۆ کۆبووەوە و سەبارەت بە بەهێزکردنی پەیوەندییەکان لەگەڵ کوردستان و ڕۆڵی رەوەندی كوردستانی لە پشتگیریی ئەم پەیوەندییانەدا ئاڵوگۆڕی بیروڕای کرد.

دەسکۆ شێروانی، بە نوێنەرایەتیی حکومەتی هەرێمی کوردستان، حیکمەت بامەرنی، نوێنەری پارتی دیموکراتی کوردستان، لە ئامادەبووانی ڕێوڕەسمەکە بوون. ئەوان لەگەڵ بەشداربووانی دیکە خۆشحاڵیی خۆیان بە سەرکەوتنی ئەم پڕۆژەیە دەربڕی. میوانانێکیش لە ناشڤیل و کەنەداوە بۆ بەشداری لە ڕێوڕەسمەکە هاتبوون.

کردنەوەی پارکی جانسۆن فارمز بە ناوی «پارکی دۆستایەتی زاخۆ-مورهێد»، دەستکەوتێکی بەرجەستە لە پەیوەندییەکانی زاخۆ و مۆرهێد بوو. ئەم هەنگاوە، لە پاڵ ئاڵوگۆڕە زانکۆییەکان و پلانی ناونانی پارکێکی هاوشێوە لە زاخۆ، ڕۆڵی دامەزراوە ناوخۆییەکان، زانکۆکان و رەوەندی کوردستانی لە دروستکردنی پەیوەندیی بەردەوام لەنێوان خەڵکی هەردوو شاردا نیشان دا.