تەندرووستى سلێمانى دوو مەرج بۆ دەستپێکردنەوەی خوێندن دادەنێت

جێگرى بەڕێوەبەرى گشتى تەندرووستى سلێمانى دەڵێ، دەبێت پێش کردنەوەى دەرگاى خوێندنگاکان، مامۆستایان و فەرمانبەرانى ناوەندەکانى خوێندن، ڤاکسین وەربگرن و رێککارەکانی خۆپارێزیش توندبکرێنەوە و بکرێنە مەرج. 

هێرش سەید سەلیم، لە کۆنفرانسێکى رۆژنامەنووسیدا رایگەیاند: “هەفتەى داهاتوو هەڵسەنگاندنى تەواو بۆ ئامارەکان دەکەین، بۆ ئەوەى بزانین گەیشتووینەتە لوتکە، یان ئامارەکان روو لە بەرزبوونەوەى زیاتر دەکەن، چونکە ئێستا لە قۆناغى چارەسەر دەرچووین، دەبێت ڤاکسین و خۆپارێزى چڕتر بکەینەوە”.

سەبارەت بە دەستپێکردنەوەی پڕۆسەی خوێندن گوتیشی: “دەبێت پێش کردنەوەى دەرگاى خوێندنگاکان، هەموو مامۆستایان و فەرمانبەران، پێکوتەى دژە کۆرۆنا وەربگرن و رێککارەکانی خۆپارێزیش توندبکرێنەوە و بکرێنە مەرج”.