Hevsozî ji bo ziyanmendên lehiya Hewlêrê tê nîşandan

Îro Pêncşem 12ê Mijdara 2026an, Nadir Doxatî, Sekreterê Komîteya Giştî ya Konfederasyona Revenda Kurdistanî, bi nûnertiya Dr. Îsmaîl Kamil, Serokê Konfederasyonê, li Hewlêra paytext serdana Dezgeha Xêrxwazî ya Barzanî kir û ji aliyê Mûsa Ehmed, Serokê Dezgehê ve bi germî hate pêşwazîkirin, tê de rûmet ji bo karên mirovî yên Dezgehê û hevsoziya Revenda Kurdistanî ji bo ziyanmendên lehiya Hewlêrê hate dûpatkirin.

Di dema hevdîtinê de, nûnerê Konfederasyona Revenda Kurdistanî silav û rûmeta Serok, Desteya Rêveber, Komîteya Giştî û hemû endamên Konfederasyonê gihand Serok û hemû karmendên Dezgeha Xêrxwazî ya Barzanî, herwiha kar û xebata mirovî ya Dezgehê bilind nirxand û tekez kir ku Revenda Kurdistanî di hemû rewşan de hevparê xem û nexweşiyên gelê xwe ne li Hewlêra paytext, bi taybetî li hember wê karesata xwezayî ya lehiyê ku ziyaneke mezin gihandiye welatiyên bajêr.

Ji aliyê xwe ve, Mûsa Ehmed spasiyeke germ pêşkêşî Serok û hemû endamên Konfederasyona Revenda Kurdistanî kir. Bal kişand li ser wê yekê ku Revenda Kurdistanî cihê serbilindiyê ye û roleke girîng û berbiçav hebûye di xizmetkirina Kurdistaniyên diyasporayê û welatê wan Kurdistanê de.

Ev serdan piştî wê karesata xwezayî ya lehiyê tê ku bajarê Hewlêra paytext girtiye û ziyaneke mezin gihandiye welatiyên bajêr, ku di wê çarçoveyê de jî hewldanên mirovî û rizgarkirinê ji bo bi hawar hatina ziyanmendan ve çûn û alîkariya wan de berdewam in.

Dezgeha Xêrxwazî ya Barzanî wekî yek ji saziyên mirovî yên diyar ên Herêma Kurdistanê, di demên krîz û karesatên xwezayî de roleke sereke di gihandina alîkarî û rizgarkirinê de ji bo lêqewimiyan dilîze, li beranber de, Konfederasyona Revenda Kurdistanî wekî sîwaneke komkirina Revenda Kurdistanî li derveyî welat, kar dike ji bo rêkxistina şiyanên Kurdistaniyên diyasporayê û xurtkirina têkilî û piştevaniya berdewam ji welat re.