سەبارەت بە هێرشی ٢٥ی حوزەیران لە ئۆسلۆ
شەوی شەممە ٢٥ی حوزەیران لە ئۆسلۆ پایتەختی نۆروێژ لەهێرشێکدا ٢ کەس کوژران و ٢١ کەس بریندار کران.
دوای تیرۆری ٢٢ی جولای ٢٠١١ ئەو هێرشە دڕندانەیە یەکێک لە مەترسیدارترین هێرشەکانە لە نۆروێژ بەرانبەر خەڵکی بێتاوان و بەرانبەر ئازادی و دێموکراسی.
ئەو هێرشە هێرشە بۆسەر یاسا، ئازادی تاکەکان و هەمەڕەنگی کۆمەڵگا، کە لە کۆڵەکە سەرەکیەکانی کۆمەڵگای نۆروێژن.
پەلاماردانی ئاشتی، ئازادی و دێموکراسی کارێکی قێزەونە.
دێموکڕاسی، ئاشتی و ئازادی ئامانجی ئێمەن، ئێمەی کورد بۆ ئەو بەهایانە خەباتمان کردوە وخەبات درێژە دەدەین. ئێمەی کورد وەک نەتەوەیەکی چەوسێندراوە و وەک نەتەوەیەک کە بەردەوام تێکۆشاوین بۆ ئازادی و دێموکڕاسی، باش ئاگاداری گروپگەلی تووندڕەوی ئایینی، دژە دێموکڕاسی و ئەو هێزە تاریکپەرستانەین کە چاویان بە ئاشتی و ئازادی هەڵنایەت.
پاڵنەری پشت هێرشەکەی ٢٥ی حوزەیران هەرچیەک بێت، ئێمە بە توندی ئیدانەی ئەو هێرشە نامرۆڤانە دەکەین. هاوخەمی هەموو ئەو کەسانەین کە لەو کارەساتەدا زیانیان بەرکەوتووە، هاوخەمی کەسوکاری کوژراو و بریندارەکانین، هیوای خێرا چاک بوونەوە بۆ بریندارەکان دەخوازین.
کۆمیتەی هاوکاری حیزبە کوردستانیەکان لە نۆروێژ
٢٦ی حوزەیرانی ٢٠٢٢
