داوا دەکرێت کۆچبەرە کوردە دەستگیرکراوەکانی لیبیا بگەڕێندرێنەوە

كەسوكاری ئەو پەنابەرانەی زیاتر لە 20 ڕۆژە لە لیبیا دەستبەسەرن، داوا لە بەرپرسانی هەرێم و عێراق دەكەن كار بۆ ئازادكردنی پەنابەرەكان بكەن.

زیاتر لە 20 ڕۆژە 57 پەنابەری كورد، كە 40 كەسیان خەڵكی باشووری كوردستانن، لە لیبیا دەستگیركراون و، كەسوكاری ئەو پەنابەرانە لە كۆنفڕانسێكی ڕۆژنامەوانیدا ڕایانگەیاند، ئەو پەنابەرانە ویستوویانە بۆ ئیتاڵیا بڕۆن، بەڵام بەهۆی خراپی كەشوهەواوە بە ناچاری چوونەتە لیبیا و لەوێ دەستگیركراون.

ئاماژەیان بەوەشدا، قسەیان لەگەڵ پەنابەرەكان كردووە و، ژمارەیان 57 كەسە و لە گەراجێكدا دەستبەسەرن.

ئەوەشیان خستەڕوو، پەنابەرەكان خواردنیان زۆر خراپە و كاریان پێدەكرێت و، باری دەروونیشیان بەهۆی ئەو دۆخەوە خراپ بووە.

ئەوان داواكارن لە بەرپرسانی هەرێم و عێراق، هەوڵبدەن ئەو پەنابەرانە بگەڕێننەوە.