رۆژنامەنووسێکی پۆڵەندی لەسەر بارودۆخی کۆچبەرە کوردەکان، سەردانی مەکتەبی پەیوەندییەکانی دەرەوەی پارتی دەکات

رۆژنامەنووسێکی دیاری پۆڵەندی کە تایبەت لەسەر پرسی ئاوارە و پەنابەران دەنووسێت، سەردانی بەرپرسی مەکتەبی پەیوەندییەکانی دەرەوە و دیسکی ئەورووپای پارتی دیموکراتی کوردستان دەکات و پرسی کۆچبەران تاوتوێ دەکەن.

ماچیی چارنیتسکی رۆژنامەنووسی دیاری پۆڵەندی، کە بۆ رۆژنامەی گازێتا ڤێبۆرچا کار دەکات، لەسەر پرسی کۆچبەران سەردانی مەکتەبی پەیوەندییەکانی دەرەوە و دیسکی ئەورووپای پارتی دیموکراتی کوردستان کرد و، پرسی کۆچبەرانیان تاوتوێ کرد، کە تێیدا دۆخی تراژێدیای کۆچبەرە کوردەکانی سەر سنووری بێلاڕووس و پۆڵەندایان باس کرد.

لە میانەی سەردان و دیدارەکەیاندا، ئاماژە بە هۆکارەکانی کۆچی خەڵکی کوردستان بۆ بیلاڕووسیا و لیتوانیا و پۆڵۆنیا، تا لەوێوە خۆیان بگەیننە وڵاتانی دیکەی ئەندامی یەکیتیی ئەورووپا، هاوکات بابەتی کۆچبەرەکان لەسەر سنووری وڵاتی پۆڵۆنیا، بە پرسێکی هەنوکەیی و گرینگ ئەژمارکرا، کە لە رێگەی پەیوەندییەکانی نێوان هەرێمی کوردستان لەگەڵ پۆڵۆنیا و بیلاڕووسیا و لیتوانا و چەندین وڵاتی دیکەی ئەورووپییەوە، چارەی خیرای بۆ بدرۆزریتەوە، کە بە هۆی خراپ بەکارهێنانی ئاوارەکانەوە لەلایەن باندەکانی مافیاوە بازرگانی بە پەنابەرانەوە دەکەن، دەیان کەسیان، کە بریتین لە ئافرەت و منداڵ و پیر و پەککەوتە و، بەتایبەت گەنجانی کورد بۆ ماوەیەک دەبێت ڕێگایەکی مەترسیداریان هەڵبژاردووە بۆ سەفەری بیلاڕووسیا، کە ئەو پەنابەرانە لەسەر سنوورەکانی بیلاڕووسیا لەگەڵ پۆڵۆنیا و لیتوانیا فڕیدراونەتە نێو دارستانەکانەوە.

تیشکیش خراوەتە سەر ئەوەی، کە هیزەکانی پاراستنی سنوور و هەزاران سەرباز و پۆلیسی ئەو وڵاتانەش سنوورەکانیان تەلبەند کردووە و، بە لێدان و بەکارهینانی هێز و توندوتیژی، ڕێگری لە چوونە ناوەوەی پەنابەران دەکەن و ڕێگرییان لێدەکەن بپەڕینە نێو سنوورەکانی وڵاتەکانیان، ئێستاش پەنابەرانی کورد لە دۆخێکی مەترسیداردا و لە نێو دارستانەکاندا خۆیان شاردۆتەوە و بێبەشن لە خۆراک و ئاو و پیداویستی سەرەتایی ژیان و، بەتانی و پیخەف و خۆ پاراستن لە سەرما و باران و مەترسییەکانی دیکە، کە لەو ڕێگەیەدا بۆ منداڵ و گەنج و ئافرەتی کورد هاتووەتە پیشەوە، کە بە تەواوەتی لە خەڵک و پەیوەندیکردن دابڕاوون و مەترسییەکی گەورە لەسەر ژیانیان درووست بووە.