مووشەکێک ئاراستەی بنکەی سەربازیی هێزەکانی ئەمریکا لە ئەنبار کرا

مووشەکێک ئاراستەی هێزەکانی ئەمریکا لە بنکەی سەربازیی عەین ئەسەد لە سنووری شارەدێی بەغدادی سەر بە شارۆچکەی هیت لە پارێزگای ئەنبار کرا.

بەپێی هەواڵی میدیا عێراقییەکان، مووشەکەکە نیوەڕۆی ئەمڕۆ یەکشەممە 20-6-2021 لە بنکەی سەربازیی عەین ئەسەد کەوتە خوارەوە.

میدیا عێراقییەکان ئاماژە بەوە دەکەن، کە تا ئێستا جۆری مووشەکەکە نەزانراوە و رووداوەکەش هیچ زیانێکی مرۆیی لێنەکەوتووەتەوە.

گرووپ و میلیشیا عێراقییەکان بەردەوام بنکە سەربازییەکان و بەرژەوەندییەکانی ئەمریکا بە مووشەک و فڕۆکی بێفڕۆکەوانی بۆمبڕێژکراو دەکەنە ئامانج و ئەمریکاش میلیشیاکانی حەشدی شەعبیی نزیک لە ئێران، بەو هێرشانە تاوانبار دەکات.