هاوسۆزی بۆ زیانلێکەوتووانی لافاوەکەی هەولێر نیشان دەدرێت

ئەمڕۆ پێنجشەممە 12ـی تشرینی دووەمی 2026، نادر دۆغاتی، سکرتێری کۆمیتەی گشتیی کۆنفیدراسیۆنی ڕەوەندی کوردستانی، بە نوێنەرایەتیی د. ئیسماعیل کامل، سەرۆکی کۆنفیدراسیۆنەکە، لە هەولێری پایتەخت سەردانی دەزگای خێرخوازیی بارزانی کرد و لەلایەن موسا ئەحمەد، سەرۆکی دەزگاکەوە بە گەرمی پێشوازی لێ کرا، تێیدا پێزانین بۆ کارە مرۆییەکانی دەزگاکە و هاوسۆزیی ڕەوەندی کوردستانی بۆ زیانلێکەوتووانی لافاوەکەی هەولێر دووپات کرایەوە.

لە میانی دیدارەکەدا، نوێنەری کۆنفیدراسیۆنی ڕەوەندی کوردستانی سڵاو و پێزانینی سەرۆک، دەستەی بەڕێوەبەری، کۆمیتەی گشتی و تەواوی ئەندامانی کۆنفیدراسیۆنەکەی گەیاندە سەرۆک و گشت کارمەندانی دەزگای خێرخوازیی بارزانی، هەروەها کار و خەباتی مرۆیی دەزگاکەی بەرز نرخاند و جەختی لەوە کردەوە کە ڕەوەندی کوردستانی لە هەموو بارودۆخێکدا هاوبەشی خەم و ناخۆشییەکانی گەلی خۆیانن لە هەولێری پایتەخت، بەتایبەت بەرانبەر بەو کارەساتە سروشتییەی لافاو کە زیانێکی گەورەی بە هاووڵاتییانی شارەکە گەیاندووە.

لای خۆیەوە، موسا ئەحمەد سوپاسێکی گەرمی ئاراستەی سەرۆک و سەرجەم ئەندامانی کۆنفیدراسیۆنی ڕەوەندی کوردستانی کرد. ئاماژەی بەوە دا کە ڕەوەندی کوردستانی مایەی شانازییە و ڕۆڵێکی گرنگ و بەرچاویان هەبووە لە خزمەتکردنی کوردستانیانی تاراوگە و نیشتمانەکەیان کوردستان.

ئەم سەردانە دوای ئەو کارەساتە سروشتییەی لافاو دێت کە شاری هەولێری پایتەختی گرتەوە و زیانێکی گەورەی بە هاووڵاتییانی شارەکە گەیاند، کە لەو چوارچێوەیەشدا هەوڵە مرۆیی و فریاگوزارییەکان بۆ بەهاناوەچوون و هاوکاریکردنی زیانلێکەوتووان بەردەوامن.

دەزگای خێرخوازیی بارزانی وەک یەکێک لە دامەزراوە مرۆییە دیارەکانی هەرێمی کوردستان، لە کاتی قەیران و کارەساتە سروشتییەکاندا ڕۆڵێکی سەرەکی لە گەیاندنی هاوکاری و فریاگوزاری بۆ لێقەوماوان دەگێڕێت، لە بەرانبەردا، کۆنفیدراسیۆنی ڕەوەندی کوردستانی وەک چەترێکی کۆکەرەوەی ڕەوەندی کوردی لە دەرەوەی وڵات، کار بۆ ڕێکخستنی تواناکانی کوردستانیانی تاراوگە و پتەوکردنی پەیوەندی و پشتیوانیی بەردەوام لە نیشتمان دەکات.