لەبەر ئەم هۆکارە ئەمەریکا بەشداری کۆبوونەوەی گفتوگۆکانی مۆسکۆ لەسەر ئەفغانستان ناکات

وەزارەتی دەرەوەی ئەمەریکا ڕایگەیاند، وڵاتەکەی بەهۆی هۆکاری لۆجیستییەوە بەشداری گفتوگۆ نێودەوڵەتییەکان سەبارەت بە ئەفغانستان ناکات، کە لەلایەن ڕووسیاوە ڕێکخراوە و وابڕیارە لەم هەفتەیەدا بەڕێوەبچێت، بەڵام دەکرێت لە داهاتوودا بەشداری بکات.

هەفتەی ڕابردوو نوێنەری تایبەتی سەرۆکی ڕووسیا، ڤلادیمێر پوتن، ڕایگەیاند، ڕۆژی چوارشەممە مۆسکۆ میوانداری کۆبوونەوەیەک سەبارەت بە ئەفغانستان دەکات و، بەرپرسانی هەریەک لە پاکستان و چین و تاڵیبان بەشداری تێدا دەکەن، لە بەرانبەریشدا گوتەبێژی وەزارەتی دەرەوەی ئەمەریکا، نێد پڕایس رایگەیاند، بەشداری گفتوگۆکانی مۆسکۆ ناکەن، کۆڕبەندی ترۆیکا پڵەس کاریگەر بووە و کۆڕبەندێکی بونیادنەر بووە، هاوکات بە پەرۆشەوەن لە داهاتوودا بەشداری لەو کۆڕبەندەدا بکەن، بەڵام ئێستا لە حاڵەتێکدا نین بتوانن بەشداری بکەن، بەو پێیەی لە ڕووی لۆجستییەوە قورسە بۆیان.

وێڕیای بەشداری نەکردنیشیان، پڕایس جەختیشی لەوە کردەوە، کە ئەوان پشتیوانی لەو کۆبوونەوەیە دەکەن.