بەمەبەستی نوێکردنەوەی دەستەی بەڕێوەبردن و داڕشتنی ستراتیژییەکی نوێ بۆ خزمەتکردنی نووسەران لە تاراوگە، فیدراسیۆنی نووسەرانی کوردستان- دیاسپۆرا لە پرۆسەیەکی دیموکراتی و شەفافدا سەرکردایەتییەکی نوێی هەڵبژارد.
ئەم هەنگاوە وەک دەستپێکی قۆناغێکی نوێ لە کاری ڕێکخراوەیی و یەکخستنی تواناکانی نووسەرانی کورد لە دەرەوەی نیشتمان هەژمار دەکرێت.
ئەمشەو1ـی ئابی 2026، لە کەشێکی دیموکراتیانەدا، فیدراسیۆنی نووسەرانی کوردستان- دیاسپۆرا پرۆسەی هەڵبژاردنی بۆ دیاریکردنی دەستەی نوێی بەڕێوەبردنی ئەنجامدا، لەم چالاکییەدا کە بە ئامادەبوونی دکتۆر ئیسماعیل کامیل، سەرۆکی کۆنفیدراسیۆنی ڕەوەندی کوردستانی و شوکری بەرواری، جێگری سەرۆکی کۆنفیدراسیۆن بەڕێوەچوو، ئەندامانی نوێی دەستەی کارگێڕی بۆ ڕاپەڕاندنی ئەرکەکانی داهاتووی یەکێتییەکە دیاریکران.
لە ئەنجامی دەنگدانەکەدا، متمانە بەم بەڕێزانەی خوارەوە بەخشرا بۆ گرتنەدەستی بەرپرسیارێتییەکانی فیدراسیۆنەکە:
- سەردار جاف، وەک سەرۆکی فیدراسیۆن.
- عەبدولباقی حوسێنی، وەک جێگری سەرۆکی فیدراسیۆن.
- داڤان یەحیا خەلیل، وەک بەرپرسی ڕاگەیاندن.
- گەوهەر مەمۆ، وەک بەرپرسی پەیوەندییەکان.
ئامادەبووان وێڕای پیرۆزبایی لە دەستە نوێیەکە، هیوای سەرکەوتنیان بۆ خواستن و جەختیان لە گرنگیی یەکڕیزی و کارکردنی پێکەوەیی کردەوە، بە مەبەستی پێشکەشکردنی خزمەتێکی شایستە و پەرەپێدانی زیاتری کارەکانی یەکێتی نووسەرانی دیاسپۆرا لە ئاییندەدا.